"Non essent igitur hæc omnia in terris mala, si ab universis fierent, quæ unus noster populus operatur. Quam beatus esset quamque aureus humanarum rerum status, si per totum orbem mansuetudo et pietas et pax et innocentia et æquitas et temperantia et fides moraretur! Denique ad regendos homines non opus esset tam multis et tam variis legibus, cum ad perfectam innocentiam Dei lex una sufficeret; neque carceribus, neque gladiis præsidum, neque terrore pœnarum, cum præceptorum cœlestium salubritas humanis pectoribus infusa ultro ad justitiæ opera homines erudiret."-Lactantius De Justitia. |